ទិញទូរស័ព្ទ គិតពីអ្វីខ្លះ? Trackback
ក្នុងយុគសម័យបច្ចេកវិទ្យាដ៏ជឿនលឿននាពេលបច្ចុប្បន្ន ការប្រើប្រាស់ ទូរស័ព្ទបានក្លាយទៅជារឿងធម្មតាមួយក្នុងជីវភាពរស់នៅប្រចាំថ្ងៃរបស់មនុស្ស។ យ៉ាងណាមិញ តាមការស្ទាបស្ទង់មួយបានបង្ហាញថា ឥរិយាបថក្នុងការទិញទូរស័ព្ទប្រើប្រាស់រវាងបុរស និងស្ត្រីគឺមានភាពខុសគ្នា អាស្រ័យលើកត្តាជាច្រើនមានដូចជា តម្លៃ រូបរាងនិងលក្ខណៈពិសេសៗមួយចំនួនទៀត។នៅតាមបណ្ដោយផ្លូវមួយចំនួនក្នុងទីក្រុងភ្នំពេញ ជាពិសេសនៅបរិវេណជុំវិញផ្សារឬហាងទាំងឡាយគេឃើញមានដាក់តាំង បង្ហាញទូរស័ព្ទជាច្រើនមានទាំងតម្លៃថ្លៃ និងតម្លៃថោកជាច្រើនម៉ូដច្រើនម៉ាកដើម្បីបំពេញតម្រូវការ និងផ្ដល់ជម្រើសកាន់តែច្រើនសម្រាប់អតិថិជនទិញយកទៅប្រើប្រាស់។
ផ្ទុយពីការលើកឡើងពីខាងលើ ប៊ុនថាន បុគ្គលិកផ្នែកឌីហ្សាញនៅអង្គការស្នាមញញឹមនៃកុមារឲ្យដឹងថា ពេលដែលសុភាពនារីទៅទិញទូរស័ព្ទ ពួកគេប្រាកដជាមើលទៅលើរូបរាងនិងសោភណភាពរបស់ទូរស័ព្ទជាអាទិភាព។ ការទិញទូរស័ព្ទប្រៀបដូចជាការទិញសំលៀកបំពាក់សម្រាប់តុបតែងខ្លួន អីចឹងដែររបស់នារី បើមើលទៅស្អាតពួកគេនឹងសម្រេចចិត្តទិញភ្លាម។ ចំណែកគុណភាព និងតម្លៃយ៉ាងណានោះជារឿងបន្ទាប់បន្សំ។
យ៉ាងណាមិញ ដារី និស្សិតសិក្សាជំនាញភាសាអង់គ្លេសនៅវិទ្យាស្ថានភាសាបរទេស IFL បានឲ្យដឹងថា កញ្ញាមិនគាំទ្រទាំងស្រុងដែលថានារីសុទ្ធតែគិតទៅលើរូបរាងជា កត្តាសំខាន់ក្នុងការទិញទូរស័ព្ទប្រើប្រាស់នោះទេ។
“នារីមួយចំនួនក៏គិតលើលក្ខណៈពិសេស និងមុខងារសំខាន់ៗដែលបំពាក់មកជាមួយទូរស័ព្ទទាំងនោះដែរមានដូចជា ទំហំកាមេរ៉ា ការអាចប្រើតភ្ជាប់ជាមួយអ៊ីនធឺណិតនិងមុខងារដទៃផ្សេងទៀត”។ ដារីបញ្ជាក់។
ចំណែក រ៉ាវី បុគ្គលិកធ្វើការនៅហាងកែសម្ផស្សមួយប្រាប់ថា ទោះបីកញ្ញាចាប់អារម្មណ៍ទូរស័ព្ទដែលមានរូបរាងស្អាតៗ ប៉ុន្តែបើតម្លៃនិងគុណភាពមិនសមស្របគ្នាក៏ត្រូវពិចារណាមើលដែរ។
“ទូរស័ព្ទស្អាតពិតជាគួរឲ្យទាក់ចិត្តមែន ប៉ុន្តែគុណភាពនិងផលប្រយោជន៍ដែលយើងទាញបានពីទូរស័ព្ទទាំងនោះក៏ជា ចំណុចដែលយើងមិនអាចមើលរំលងបាននោះដែរ”។
តាមការស្ទាបស្ទង់របស់ Vuclip ជាក្រុមហ៊ុនផ្ដល់សេវាកម្មវិដេអូចល័ត បង្ហាញ ថា ក្នុងចំណោមអ្នកចូលរួមឆ្លើយសំនួរជាបុរសចំនួន ៣៣% ឆ្លើយថាកត្តាដែលសំខាន់បំផុតសម្រាប់ពួកគេក្នុងការសម្រេចចិត្តទិញ ទូរស័ព្ទគឺតម្លៃ បន្ទាប់មក ៣១% ឆ្លើយថាគឺមុខងារសំខាន់ៗដទៃទៀត។ ចំណែកនារីវិញសម្រាប់សំនួរដូចគ្នានេះដែរ ៣៧% គឺរូបរាង ២១% លើទំហំអេក្រង់ និងតែ ១៨% ដែលខ្វល់ខ្វាយពីបញ្ហាតម្លៃ។
ម្ចាស់ហាងលក់ទូរស័ព្ទ ឥណ្ឌូឆាយណា ១ សុផារី បានឲ្យដឹងថា បើតាមការសង្កេតឃើញទាំងបុរសនិងនារីភាគច្រើនកាលណាទិញទូរស័ព្ទ ច្រើនផ្ដោតសំខាន់លើរូបរាងជាចម្បង។
ម្ចាស់ហាងរូបនេះបន្តថា កាលណាពួកគេឃើញទូរស័ព្ទដែលមានរូបរាងស្អាតនិងមើលទៅគួរឲ្យ ទាក់ទាញតែងតែសួរនាំក្នុងន័យបង្ហាញការចាប់អារម្មណ៍ បន្ទាប់មកទើបមើលលក្ខណៈពិសេសៗមួយចំនួនទៀត។ ចំណែកបញ្ហាតម្លៃវិញអាស្រ័យលើលទ្ធភាពថវិកាដែលខ្លួនគេមាន។
