រុស្ស៊ី ចំណាយប្រាក់ ១២៣ពាន់លាន ដុល្លារ សម្រាប់ផលិត យន្តហោះធ្វើសង្រ្គាម

Friday, 15 June 2012 07:59 ប្រែសម្រួលៈ អ៊ឹត ចណ្ណា-Posted: ID-009

ម៉ូស្គូៈ ទឹកប្រាក់ប្រមាណជា ១២៣ពាន់លានដុល្លារ អាមេរិក នឹងត្រូវបានបម្រុងទុកសម្រាប់ការ ផលិតយន្តហោះធ្វើសង្រ្គាមរបស់ប្រទេសរុស្ស៊ី  នៅក្នុងឆ្នាំ២០២០។ នេះជាការលើកឡើងរបស់ លោកប្រធានាធិបតីរុស្ស៊ី លោក ប្លាឌឺមៀ ពូទីន កាលពីថ្ងៃព្រហស្បតិ៍ ទី១៤ ខែមិថុនា ឆ្នាំ២០១២កន្លងទៅនេះ។

យោងតាមទីភ្នាក់ងារព័ត៌មានចិនស៊ិនហួ ចុះថ្ងៃទី១៥ ខែមិថុនា ឆ្នាំ២០១២ បានឲ្យដឹងថា ក្នុងអំឡុងនៃការធ្វើ ដំណើរទស្សនកិច្ចក្នុងតំបន់ចំណតយន្តហោះ ៣៩៣  ភាគខាងត្បូង នៃដែនដី Krasnodarលោកប្រធានាធិបតី ពូទីន បានលើកឡើងថា តម្រូវការទឹកប្រាក់សម្រាប់កិច្ចការពារជាតិក្នុងឆ្នាំ២០២០ អាចនឹងមានចំនួនរហូតដល់ ៦១៣ពាន់លានដុល្លារអាមេរិក។

មេដឹកនាំរូបនេះ បានជំរុញក្នុងការអភិវឌ្ឍ ការផលិតគ្រាប់បែកខ្នាតធំ និងយន្តហោះគ្មានអ្នកបើកបរសម្រាប់បម្រើ វិស័យយោធា។ យោងតាមការលើកឡើងរបស់លោកប្រធានាធិបតី ពូទីន បានឲ្យដឹងថា រុស្ស៊ី អាចនឹងចំណាយ ទឹកប្រាក់រហូតដល់១៣ពាន់លានដុល្លារអាមេរិក ក្នុងការកសាងយន្តហោះចម្បាំង ក្នុងរយៈប្រាំបីឆ្នាំក្រោយ។

លោក ពូទីន បានសង្កត់ធ្ងន់ថា រុស្ស៊ី ត្រូវតែសម្លឹងមើលទៅអនាគត ព្រមទាំងឆ្លើយតបតាមតម្រូវការឲ្យបានទាន់ ពេលវេលា។  តាមរយៈការលើកឡើងរបស់ប្រធានាធិបតី ទើបនឹងឡើងកាន់អំណាចរូបនេះ បានបង្ហាញឲ្យដឹង ថា គោលដៅសំខាន់របស់លោក គឺផ្តោតទៅលើការបំពេញកិច្ចការឲ្យទាន់ពេលវេលាដែលនឹងរំកិលមកក្នុងពេល ឆាប់៕