សៀងហៃៈ យោងតាមគេហទំព័រសិង្ហបុរី ”
Channel News Asia” ចុះផ្សាយនៅរាត្រីថ្ងៃទី១១ ខែឧសភា ឆ្នាំ២០១២ ថា
អង្គភាពត្រួតពិនិត្យយានយន្ដ នៅក្នុងប្រទេសចិន បានបញ្ជាឱ្យ ជីអឹម
ប្រមូលយានយន្ដម៉ាក Chevrolet មកធ្វើការជួសជុលឡើងវិញ ប្រមាណ ៤៧ពាន់គ្រឿង
បន្ទាប់ពីបានរកឃើញថា យានយន្ដទាំងនោះ មានបញ្ហា ប្រព័ន្ធហ្វ្រាំង ។
អង្គភាពខាងលើបានបញ្ជាឱ្យ បណ្ដាក្រុមហ៊ុនសាខាចែកចាយយានយន្ដ ប្រភេទខាងលើ ចាប់ផ្ដើមប្រមូល ដើម្បីបញ្ចៀសគ្រោះថ្នាក់ កើតឡើងនាពេលអនាគត ។
ដោយឡែកក្រុមហ៊ុន ជីអឹម ដែលផលិតយានយន្ដ ប្រភេទនេះបានលើកឡើងថា ការចែកចាយយានយន្ដនៅក្នុងប្រទេសចិន គិតក្នុងខែមេសា ឆ្នាំ២០១២ នៅតែឈានមុខគេដដែល នៅលើទីផ្សារពិភពលោក ។
ក្រុមហ៊ុន ជីអឹម បានបញ្ជាក់ថា ការលក់យានយន្ដ នៅក្នុងខែមេសា បានចំនួន២២៧,២១៧គ្រឿង កើនឡើង១១,៧ភាគរយ ធៀបនឹងអំឡុងពេលដូចគ្នាកាលពីឆ្នាំមុន។
ក្រុមហ៊ុនដដែលនេះ បានគូសបញ្ជាក់ទៀតថា សម្រាប់ដើមឆ្នាំ ៤ខែកន្លងមកនេះ ក្រុមហ៊ុនបានលក់យានយន្ដ នៅក្នុងប្រទេសចិនបានកើនឡើង ៩,៤ភាគរយ ស្មើនឹង ៩៧២,៣៦៩គ្រឿង ៕
